З мэтай папярэджвання пажараў і гібелі людзей ад іх з 1 лютага ў Мінску стартуе рэспубліканская інфармацыйна-прапагандысцкая кампанія (акцыя) «Бяспека ў кожны дом!», якая пройдзе ў два этапы.

Першы этап пройдзе з 1 па 14 лютага і ў цэнтры ўвагі сталічных ратавальнікаў будуць шматдзетныя сем'і і сем'і, дзе дзеці знаходзяцца ў сацыяльна небяспечным становішчы. Работнікі МНС наведаюць дамы і кватэры, дзе правядуць інтэрактыўную гутарку з усімі членамі сям'і аб выкананні правілаў бяспекі ў побыце, пры эксплуатацыі пячнога ацяплення і электраабсталявання, а таксама раскажуць аб небяспецы пакідання дзяцей адных без нагляду. Бацькам і дзецям прапануюць пагуляць у гульню «Бяспечны дом», а таксама прадэманструюць відэафільмы МНС «Не пакідайце дзяцей адных!», «Недзіцячыя гульні» і, вядома, мультфільмы «Чароўная кніга» або «Спецатрад 112». Дарослыя атрымаюць брашуру «Энцыклапедыя бяспекі для бацькоў» і паспрабуюць прайсці спецыяльнае тэсціраванне. Для ўсіх удзельнікаў акцыі ратавальнікі падрыхтавалі запрашальныя білеты на ўдзел у фінальным мерапрыемстве кампаніі, экскурсію ў музей пажарнай аварыйна-выратавальнай справы, пажарную аварыйна-выратавальную часць або ў цэнтр бяспекі МНС.

З 15 па 23 лютага пройдуць мерапрыемствы другога этапа: у гандлёвых аб'ектах, інтэрнатах прадпрыемстваў і арганізацый, месцах з масавым знаходжаннем людзей.

У гандлёвых аб'ектах, у якіх ёсць аддзелы па продажы тавараў для дома, электрычных прыбораў, гаспадарчых тавараў і будаўнічых матэрыялаў, а таксама сродкаў супрацьпажарнай абароны, работнікі МНС размесцяць вядомыя элементы - макеты «АПІ», «Печ», «Вогнетушыцель» са слоганам «Прынясі бяспеку ў дом», а таксама размесцяць свой інфацэнтр «сто адно акно», дзе правядуць кансультацыю па пытаннях бяспекі дома, прапануюць запоўніць чэк-ліст бяспекі і раздадуць наглядна-выяўленчую прадукцыю.

Па-за ўвагай не пакінуць ратавальнікі такія важныя аб'екты, як інтэрнаты, у якіх пражывае вельмі шмат людзей. У інтэрактыўна-дыялогавым фармаце працаўнікі прапаганды МНС правядуць мерапрыемствы з імі. Ратавальнікі раскажуць пра пажары, якія адбыліся ў рэспубліцы, пакажуць фільм пра выкананне правілаў бяспечных паводзін у інтэрнаце, відэаролік «Дынаміка развіцця пажару ад цыгарэты», прадэманструюць дзеянні АПI, правядуць практычныя заняткі і майстар-класы па прымяненні вогнетушыцеля, аказанні першай дапамогі, правядуць віктарыну па АБЖ і разыграюць памятныя прызы.

Далучайцеся да кампаніі, каб бяспека панавала і ў вашым доме!